Wednesday 26th of February 2020

अख्तियार भूस : कित्ता काटको दुई लाख घुस !

काठमाडौं। राज्यले भ्रष्टाचारका विरुद्ध जतिसुकै निकाय स्थापना गरी कडाई गरेपनि यो निरन्तर प्रक्रियाका रुपमा चलिरहेको छ । अत्यधिक जनसम्पर्क हुने नापी र मालपोत कार्यालयहरु भ्रष्टाचारका अखडाका रुपमा रहेकै छन् । नापी कार्यालय मनमैंजूका प्रमुख ध्रुव थापा उपत्यकाका कहलिएका नापीका डन हुन् । सेवाग्राहीसंग उनी आफैंले र अधिकांश असुलीका कामहरु सर्भेक्षकद्वय अरुणकुमार खड्का र हरि तिवारीमार्फत गर्दैआएका छन् । १२ वर्षअघि अमिनबाट सेवा शुरु गरेका खड्का स्थानीय हुन् र हाल गोंगबु बसपार्क नजिकै बंगला बनाइरहेको स्रोत बताउछ ।


मनमैंजुकै एक कर्मचारी खड्का र तिवारीको नाम लिंदै भन्छन् यी दुवैजना बिहानैदेखि खसीबजारमा भेला भई दिनभर कति पैसा कसरी उठाउने भनी योजना बनाउ“छन् र प्रमुख ध्रुव थापालाई समेत सहभागी गराएर असुली धन्दा चलाउँछन् । नियम मिचेर खड्का ३ वर्षदेखि मनमैंजूमा छन् । यिनी अमेरिका, दुबई, अष्ट्रेलियालगायत दर्जनभन्दा बढी देशमा घुमी पनि सकेका छन् । यो सबै रकम उनले राष्ट्रसेवक कर्मचारीका नाममा नापीमा आउने सर्वसाधारणलाई दुःख दिएर असुल गर्ने गरेका नापीकै एक अधिकृत बताउँछन् । यसैगरी तिवारी अख्तियारको फन्दामा परी अनेक शक्तिको प्रभावमा भर्खरै छुटकारा पाएका कर्मचारी हुन् ।

मनमैंजु नापी प्रमुख थापाले भने सरकारले रोकेको कित्ताकाट गरी प्रतिकित्ता १ लाखसम्म असुल्ने गरेको पीडितहरुको गुनासो छ । उनले धर्मस्थलीतिरका जग्गा व्यवसायीलाई ३ आनाको एक घडेरी दिनेभए सबै काम गरिदिन्छु भनी प्रस्ताव राखेका एक व्यवसायीले बताए । थापाले हालै अनुपम फुडल्याण्डमा २० लाखभन्दा बढी खर्चिएर छोरीको बीहेको पार्टी दिएका छन् । यत्रो पैसा मासिक ३५÷४० हजार वैध आम्दानी हुने कर्मचारीले घुस नअसुली कसरी गर्न सक्छ ?

यसैगरी टोखा नापीप्रमुख बेचन यादवले पनि रोकिएको कित्ताकाटलाई कमाउने माध्यम बनाएका छन् । उनी आफैं अग्रसर नभई सर्भेक्षक अशोक खरेललाई लगाएर कित्ताकाटको प्रति कित्ताकाट २ लाखसम्म असुल्ने धन्दा चलाइरहेका छन् । अशोक यस्ता चतुर खेलाडी हुन् कि उनी कार्यालय आउँदा थोत्रो मोटरसाइकल प्रयोग गर्छन् र घरमा भने तरकारी किन्न समेत करीब आधा करोड पर्ने गाडी रचढ्ने गर्छन् ।

नापीमा आउने सेवाग्राहीलाई अनेक अप्ठेरा देखाएर कामचाहिं गरिदिन्छु तर यति चाहिन्छ भनी उल्टै गुन लगाएको देखाएर अरुभन्दा बढी असुल्न सिपालु खरेलले दैनिक उठाउने रकम नै अपत्यारिलो हुने उनी निकट कर्मचारी बताउँछन् ।

टोखाका खरेल र मनमैंजुका खड्काले जे भन्यो त्यही मान्ने प्रमुख बेचन र ध्रुबहरुको ताल देखेर कर्मचारीहरु भन्छन् यहाँ कुकुरले पुच्छर होइन पुच्छरले कुकुर हल्लाउने अवस्था छ ।

( साँघु)

प्रतिक्रिया दिनुहोस्