Thursday 23rd of January 2020

सियोमा पनि विदेशकै भर

काठमाडौं । मुलुकमा चर्चित भनाइ छ– सियो पनि बनाउन नसक्ने देश । हुन पनि हो, नेपालको आयात सूची हेर्ने हो भने त्यस्ता सामान भेटिन्छन् जो विश्वास गर्न गाह्रो हुन्छ।

आयात भइरहेका सियो, टुथ पिक, ट्वाइलेट पेपर, चक, टुथ ब्रस, स्यानेटरी प्याड, धनियाँ, जौ, पानीजस्ता सामान्य सामानको नाम लेख्दै जाने हो भने लामै सूची हुन्छ । भन्सार विभागले हरेक महिना सार्वजनिक गर्ने आयात–निर्यातको विवरण हेर्ने हो भने करोडौं रुपैयाँका अति सामान्य वस्तुहरू आयात भइरहेको देखिन्छ ।
चालू आर्थिक वर्षको १० महिनाको तथ्यांकअनुसार मुलुकमा ५९ हजार पाँच सय ४४ केजी सियो आयात भएको छ । जसलाई ८० लाख रुपैयाँ बुझाउनुपरेको छ । विश्वका विभिन्न आठ देशबाट कपडा सिलाउन, बुन्न र मेसिनमा प्रयोग हुने फलाम र स्टिलको सियो आयात भएको भन्सार विभागको विवरणमा उल्लेख छ।

मुलुकले भारत, चीन, जापान, दक्षिण कोरिया, थाइल्यान्ड, जर्मनी, नेदरल्यान्ड, टर्की र अमेरिकाबाट सियो आयात गर्छ । दस महिनामा भारतबाट सबैभन्दा धेरै १० हजार ६ सय पाँच केजी सियो आयात भएको छ । जसको मूल्य ४३ लाख १५ हजार छ । भारतभन्दा झन्डै आधा पाँच हजार एक सय ९७ केजी सियो ११ लाख ३३ हजार मूल्य तिरेर चीनबाट ल्याइएको छ । त्यस्तै ‘स्विङ मेसिन निडल’ शीर्षकमा २२ लाख ५० हजार मूल्यको चार हजार नौ सय ८१ केजी सियो आयात भएको छ।

१० महिनामा ५९ हजार केजी सियो, २ लाख ५७ हजार केजी ट्वाइलेट पेपर र ७ हजार केजी टुथ पिक विभिन्न देशबाट आयात भएको छ ।
अर्को चाख लाग्दो विषय छ– मुलुकमा लाखौं रुपैयाको दाँत कोट्याउने ‘टुथ पिक’ आयात हुन्छ । यो थाइल्यान्डबाट समेत ल्याइन्छ । दस महिनामा सात लाख १६ हजार मूल्यको ७ हजार केजी काठको टुथ पिक आयात भएको छ । ‘उड टुथ पिक्स’ शीर्षकमा ५२ लाख ४८ हजार मूल्य तिरेर चीनबाट ५४ हजार केजी आएको छ । सोही शीर्षकमा भारतबाट एक सय ५५ केजी र थाइल्यान्डबाट एक सय २५ केजी ल्याइएको छ । जसको मूल्य क्रमशः १७ हजार र ११ हजार रहेको तथ्यांकमा उल्लेख छ।

खाना खाएपछि दाँत कोट्याएर मात्र भएन, शौच पनि अनिवार्य हुन्छ । त्यही शौचका बेला प्रयोग हुने कागज (ट्वाइलेट पेपर) का लागि पनि विश्वका ६ वटा देशको भर पर्नुपरेको छ । मुलुकमा ‘ट्वाइलेट पेपर’ चीन, भारत, इन्डोनेसिया, मलेसिया, थाइल्यान्ड र युएईबाट आयात भइरहेको छ ।

दस महिनामा दुई लाख ५७ हजार ८१ केजी ट्वाइलेट पेपर आयात भएको छ, जसको मूल्य चार करोड ३७ लाख नौ हजार रुपैयाँ तिर्नुपरेको छ । जसमध्ये सबैभन्दा धेरै चीनबाट एक करोड ५२ लाख ९३ हजार रुपैयाँमा एक लाख दुई हजार सात सय ८५ केजी खरिद गरेर ल्याइएको छ । मलेसियाबाट ७७ हजार केजी, इन्डोनेसियाबाट ४३ हजार केजी र भारतबाट ३० हजार केजी आयात भएको छ ।

ग्रामीण स्कुलमा प्रयोग हुने चक ६ लाख ७३ हजार केजी आयात गरिएको छ । जसको मूल्य झन्डै ७० लाख रुपैयाँ तिरिएको छ । त्यस्तै १० महिनामा ५४ हजार केजी सेफ्टी पिन र २२ करोड ६ लाखवटा टुथ ब्रस आयात भएको छ । दाँत माझ्ने ब्रसका लागि २७ करोड ७५ लाख रुपैयाँ तिर्नुपरेको छ ।पूर्वअर्थसचिव रामेश्वर खनालले उत्पादन लागत धेरै र बजार कम हुँदा यस्ता सानासाना वस्तु विदेशबाट आयात गर्नुपरेको बताए ।
-नागरिक

प्रतिक्रिया दिनुहोस्