Wednesday 19th of December 2018

काठमाडौंवासीलाई समयमै मेलम्चीको पानी खुवाउने संकल्प रोक्ने तत्वको घेराबन्दी यसरी तोडिन मन्त्री मगरले

काठमाडौं । खानेपानी मन्त्रालयको नतृत्व सम्हालेलगत्तै मेलम्ची खानेपानी आयोजनाको निर्माण कार्यलाई पहिलो प्राथमिकतामा राखेकी खानेपानी मन्त्री बीना मगर अहिले भने चौतर्फी घेराबन्दीमा परेकि छन । मेलम्ची परियोजना सम्पन्न गर्न नचाहने र मन्त्री बीनासँग असन्तुष्ट पक्षले उनीविरुद्ध घेराबन्दी गरेका हुन ।

मन्त्री भएलगत्तै मेलम्ची परियोजनाको अवलोकनका क्रममा मन्त्री मगरले निर्माण कार्यको सम्पूर्ण बेलिबिस्तार मागेपछि आयोजना र निर्माण कम्पनीले दशैंसम्म मेलम्चीको पानी सुन्दरीजलमा खसाल्न सकिने दावी गर्दै रिपोर्ट दिए । तर त्यो रिपोर्ट मात्रै विश्वास गरिहाल्ने आधार भने थिएन । तर यही बीचमा विश्व बैंक, मेलम्ची आयोजना, ठेकेदार, परामर्शदातालगायतको संयुक्त बैठकले दशैंअघि नै मेलम्चीको पानी सुन्दरीजल ल्याइ पुर्याउन कार्ययोजना नै तयार गरे ।

कार्ययोजना अनुसार, मेलम्ची निर्माणको कार्यलाई बिभिन्न भागमा बाँडेर सोही अनुरुप कार्य गर्न दैनिक कार्यतालिका नै निर्माण गरिएको थियो । यो कार्यतालिका अनुरुप काम भइरहेको भए अहिलेसम्म मेलम्चीको पानी आइसक्ने अवस्था हुन्थ्यो । मन्त्रीको निरन्तर ताकेता र खबरदारीसँगै यो कार्यतालिका अनुरुप दैनिकरुपमा धमाधम काम शुरु भएको थियो । तर मन्त्रालय श्रोतका अनुसार, यही बीचमा मन्त्रीलाई असफल पार्ने खेल शुरु भयो ।

मेलम्ची आए मन्त्रीले चौतर्फी प्रशंसा पाउने कुराबाट अत्तालिएका समूहहरुले समग्र निर्माण कार्यमा हस्तक्षेप शुरु गरे ।
श्रोतका अनुसार, मन्त्रालय भित्रैबाट र बाहिरबाट योजनाबद्ध तरिकाले मेलम्चीको पानी समयमा नै आउन नदिने षडयन्त्र शुरु भएको थियो । यति मात्रै होइन, मेलम्चीको कामलाई मन्त्रीको स्प्रीट अनुरुप कार्यतालिका प्रभावित गर्ने किसिमले खेल शुरु भयो । र, मन्त्रीले बारम्बार आफ्नो सचिवालयको टीमलाई मेलम्चीको अनुगमनमा पठाए पनि सोचे अनुरुपको काम अघि बढेन ।

“कहिले के बहाना, कहिले के बहाना रु’ श्रोतले भन्यो, “निर्माण कम्पनी र परामर्शदाताको तहबाट बारम्बार अल्झ्याउने खेल भयो । र, मेलम्ची आयोजनाबाट समेत खासै कडाइका साथ अनुगमन र निर्देशन दिने काम भएन ।” शुरुमा क्षतिपूर्तिको विषयमा निर्माण कम्पनीले बखेडा झिधेपछि मन्त्रीले परराष्ट्रको च्यानल समेत प्रयोग गरेर उक्त कम्पनीको हेडक्वार्टरबाट उच्च प्रतिनिधि बोलाएर वार्ता गर्नुभयो । यो चानचुने प्रयास थिएन ।

मन्त्रीको सबै कोशिस कार्यतालिका अनुरुप पानी आओस् भन्ने थियो । त्यतिखेरको पहलले केही गति लियो पनि । तर पछि फेरि उस्तै भयो । मन्त्रीको निर्देशन सम्बन्धित कर्मचारीले मनैबाट पालना नगर्ने र मन्त्रालयको कर्मचारी नेतृत्वले समेत यसमा खासै पहल नगरेपछि मन्त्रीलाई बदनाम गर्न चाहनेहरुले मौका पाएको श्रोतको दावी छ ।

मन्त्री बीना मगर आफ्ना निकटतम प्रतिद्वन्द्वीबाट अत्यधिक भोट ल्याएर जितेकी सांसद हुनुहुन्छ । कञ्चनपुर जिल्लाको क्षेत्र नम्बर १ बाट विजय हासिल गरेकी मन्त्रीले खानेपानी तथा सरसफाईका क्षेत्रमा कार्ययोजना नै निर्माण गरेर उदाहरणी कार्य गर्ने संकल्प बोकेको श्रोतको दावी छ । तर कतिपय कुराहरु सोचेजस्तो भएनन् । एकातिर नेकपा अध्यक्ष प्रचण्डको बुहारी भएका कारण अध्यक्षलाई निशाना बनाउने पक्षहरुले उनको बदनाम गर्न खोजे भने अर्कोतर्फ विगतदेखि नै खाइपाइ आएकाहरुले समेत मन्त्रीको एक्सन देखेर उनलाई असफल बनाउन खोजेको श्रोतको भनाई छ ।

मन्त्रीका बारेमा भ्रम छर्ने काम एकीकृत सूचना संयन्त्र नहुँदा समेत भएको केहीले टिप्पणी गरेका छन् । आयोजनाको कार्य प्रगतिका बारेमा आयोजना प्रमुखको एउटा भनाई हुनु र मन्त्रालयको सचिवको अर्को दावी भएबाट झन अन्यौलता सिर्जना भएको केहीले टिप्पणी गरेका छन् ।
मेलम्ची ढिलो हुनुमा मन्त्री मगरको कुनै हात नभएको र उनको अथक प्रयासपछि पनि यिनै तत्वहरु सक्रिय भएका कारण ढिलाई भएको श्रोतको दावी छ । प्रायजसो मन्त्रीहरुको चासो आफ्ना कार्यकर्ता भर्ना गर्न रहने प्रवृति रहेको अवस्थामा मन्त्री मगरले मन्त्री भएपछि त्यता चासो दिएकि थिइनन । बरु उनको चासो मात्र मेलम्ची थियो।

तर चौतर्फी घेराबन्दी पारिएपनि मन्त्री मगरले आफूले संकल्प भने पूरा गर्ने बताइन । कामगर्दै जाने क्रममा नियत सफा भएपनि प्राविधिक रुपमा कतिपय कुरामा ढिलाई हुन्छ । सोचे अनुरुपको काम अघि बढ्दैन । तर नियत र मन सफा भए यसले एकदिन राम्रो परिणाम ल्याउने मन्त्रीको बुझाई छ । तुलनात्मक रुपमा हेर्दा मेलम्ची आयोजनाको यति लामो यात्रामा पहिलो पटक यति बढी चासो र कार्यप्रगति भएको कुरा भने कसैले नकार्न सक्दैनन् । यो सबै काम मन्त्री मगरले विशेष चासो र सतर्कता नअपनाएको भए हुने थिएन ।

प्रतिक्रिया दिनुहोस्