Sunday 8th of December 2019

चिकित्सकको लापरबाहीका कारण विरामीको मृत्यु भएको भन्दै मृतकको आफन्तद्वारा नाराबाजी

सप्तरी । चिकित्सकको लापरबाहीका कारण विरामीको मृत्यु भएको भन्दै मृतकका आफन्तले बुधबार राजविराजस्थित गजेन्द्रनारायण सिंह सगरमाथा अञ्चल अस्पतालमा नाराबाजी गरेका छन् ।

चिसोका कारण विरामी परेका छिन्नमस्ता गाउँपालिका ६ निवासी सहदेव सदाको बुधबार बिहान उपचारकै क्रममा मृत्यु भएपछि आफन्तले नाराबाजी गर्दै प्रदर्शन गरेका छन् ।

अस्पतालमा भर्ना भएपनि जाँच गर्न चिकित्सक नआउँदा ५५ बर्षीय सदाको मृत्यु भएको सदा परिवारको आरोप छ । सदाको मृत्यु भएलगत्तै उनका आफन्तले अस्पताल प्राङ्णमै नाराबाजी गर्न शुरु गरेका थिए ।

उनीहरुले अस्पतालको मुख्यद्वारमै टायर बालेर बिरोध प्रदर्शन गरेपछि केहीबेर प्रहरी र प्रदर्शनकारीबीच घम्साघम्सीसमेत भएको थियो ।

प्रदर्शनकारीले बालेको टायर प्रहरीले निभाइदिएका थिए । तैपनि प्रदर्शनकारीले प्रदर्शन नरोकेपछि अहिले अस्पताल प्रशासन र मृतकका आफन्तबीच वार्ता भइरहेको अस्पतालले जनाएको छ ।

अस्पतालका निमित्त प्रमुख डा. रञ्जित झाले सदाको अवस्था सिकिस्त रहेकोले मृत्यु भएको बताएको छ । उनले सदाको उपचारमा दुई जना चिकित्सक खटिए पनि सिकिस्त अवस्था भएका कारण मृत्यु भएको बताए ।

प्रतिक्रिया दिनुहोस्