Wednesday 13th of November 2019

कार्तिक १३ गतेदेखि डाक्टर केसी पूनः अनशन बस्‍ने

काठमाडौं । डा गोविन्द केसी ६ बुँदे माग राख्दै पूनः अनशन बस्ने भएका छन् । शिक्षण अस्पतालबाट २६ वर्षे अवकाश लिएका डाक्टर गोविन्द केसीले कार्तिक १३ गतेदेखि फेरि अनशन सुरु गर्ने बताएका हुन्।

डा. केसीले आफुले अवकाश लिएपनि जुनसुकै ठाउँबाट अनशन बस्न सक्ने बताएका हुन् । आज एक पत्रकार सम्मेलन गर्दै उनले विश्वबिद्यालयहरुमा पदाधिकारी नियुक्ति, चिकित्सा शिक्षा ऐनमा संशोधन, संक्रमणकालीन न्यायसम्बन्धी आयोगहरुमा हुने दलीय भागवंडा लगायतका ६ बुँदे माग राख्ने जानकारी दिएका छन्।

यस्ता छन् केसीका माग –

१, हामीसँग २०७५ साउन १० गते भएको सम्झौताअनुसार चिकित्सा शिक्षा ऐनमा संशोधन गरियोस।

२, विश्वबिद्यालयहरुमा पदाधिकारी नियुक्तिको हालको प्रक्रिया रोकी पराशर कोइराला नेतृत्वको मापदण्ड निर्धारण समितिले दिएको सुझाब अनुरूप निष्पक्ष र पारदर्शिता ढङ्गले पदाधिकारी नियुक्त गर्ने कानूनी व्यवस्था गरियोस।

३, आंदोलनरत मेडिकल विद्यार्थीहरुका मागहरु पूरा गर्दै नेपालका सबै निजी मेडिकल कलेजले अवैध रुपमा असूल गरेको सम्पूर्ण रकम फिर्ता गरियोस। अरबौंको ठगी तथा आर्थिक अपराधका दोषी मेडिकल कलेजका संचालकहरुलाई फौजदारी कानुनबमोजिम कडाभन्दा कडा कारबाही गरियोस।

४, संसदीय उपसमितिको माफियाको प्रभावमा गरिएको शुल्क र सीट संख्यामा वृद्वि गर्नेसम्बन्धी लगायतको निर्णय तत्काल खारेज गरियोस।

५, कर्णाली स्वास्थ्य विज्ञान प्रतिष्ठानमा तत्काल पूर्वाधार र जनशक्ति पुर्‍याएर एमबिबिएस कार्यक्रम संचालन गरियोस। कर्णाली स्वास्थ्य विज्ञान प्रतिष्ठानमा एमडिजिपी कार्यक्रम संचालन गर्ने अनुमति अनुचित ढङ्गले प्रधानमंत्री कार्यालयले अडकाएर राखेकाले त्यसलाई तुरुन्त स्विकृति दिँदै शीघ्र एमबिबिएस कार्यक्रम संचालन गर्ने व्यवस्था गरियोस । प्रदेश नं दुई र चार तथा डोटीरडडेल्धुरा, उदयपुर र इलाम र पाँचथरमा सरकारी मेडिकल कलेज खोल्ने प्रक्रिया अघि बढाइयोस।

६, संक्रमणकालीन न्यायसम्बन्धी आयोगहरुमा दलीय भागवंडाबाट नभई पीडितको विश्वास जित्ने विज्ञहरुलाई नियुक्त गरियोस्।

प्रतिक्रिया दिनुहोस्