विपक्षीकाे बहिष्कारपछि लुम्बिनी प्रदेशसभा बैठक स्थगित

रुपन्देही । बजेटमाथि छलफल गर्न आह्वान गरिएको आजको लुम्बिनी प्रदेशसभा बैठक स्थगित भएको छ । विपक्षीले सरकारको वैधतामाथि प्रश्न उठाउँदै बहिष्कार गरेपछि आजको प्रदेशसभा बैठक स्थागित भएको हो ।

असार १ गते प्रस्तुत बजेटमाथि आजदेखि प्रदेशसभामा छलफल गर्ने कार्यसूची थियो । सरकारले संसदमा विश्वासको मत नलिँदै बजेटका विषयमा छलफल गर्न नसकिने जनाउँदै आजको संसद बैठक बहिस्कार गरेको नेपाली कांग्रेका सचेतक निर्मला शर्माले बताइन् ।

बैठकमा विशेष समय लिएर बोल्दै नेपाली कांग्रेस संसदीय दलका नेता वीरेन्द्र कनौडियाले सरकारको वैधताका विषयमा प्रष्ट नहुँदासम्म बैठक अगाडि बढाउन नसकिने जनाएका थिए ।

मुख्यमन्त्रीमा शंकर पोखरेल पुनःनियुक्ति भएपछि सदनमा विपक्षी नेपाली कांग्रेस, माओवादी, जसपाको उपेन्द्र यादव समूह र जनमोर्चाले गठबन्धन बनाएर सरकारको विरोध गरिरहेका छन् ।

नेकपा एमालेका सचेतक भूमीश्वर ढकालले विपक्षी दललाई यो विषयमा छलफल गर्न मुख्यमन्त्री शंकर पोखरेलले हिजो र आज बोलाए पनि नआएको र आजको बैठक रोकिएको बताए ।

प्रदेशसभाको स्थगित बैठक ९ गते दिउँसो १ बजे बस्नेछ ।

६,असार.२०७८,आईतवार १६:३७ मा प्रकाशित

प्रतिक्रिया दिनुहोस्