एन्फा कार्यसमिति बैठक ४ बजे, प्रशिक्षक अब्दुल्लाहको राजीनामा र छानविनको मागमा छलफल हुने

काठमाडौं । अखिल नेपाल फुटबल संघ (एन्फा) को कार्यसमिति बैठक आज बस्दैछ । प्रशिक्षकको राजीनामा प्रक्ररण, उपाध्यक्ष तथा दुई पत्रकार सम्बन्धी घटनाले पछिल्लो समय हेडलाइन मेकर बनिरहेको एन्फाको कार्यसमिति बैठकमा यीनै विषयमा छलफल हुने बताइएको छ ।

एन्फा मुख्यालय सातदोबाटोमा अपरान्ह ४ बजे बस्ने बैठकमा मुख्य प्रशिक्षक अब्दुल्लाह अलमुताइरीको राजीनामा र छानविनको मागलगायतमा छलफल हुने प्रवक्ता किरण राईले जानकारी दिएका छन् । सँगै आसन्न साफ च्याम्पियनसीप पनि बैठकको एजेण्डा छ ।

एन्फाका वरिष्ठ उपाध्यक्ष पंकजविक्रम नेम्वाङले आफूसँग तीन हप्तादेखि नाटक गरिरहेको बताउँदै बाध्य भएर प्रशिक्षकबाट राजीनामा दिन लागेको उल्लेख गर्दै स्टाटस लेखेका थिए । उनको त्यो स्टाटससँगै तरङ्गित बनेको नेपााली फुटबल जमात कार्यसमिति बैठकप्रति पनि चासो दिइरहेको छ ।

त्यसो त उपाध्यक्ष नेम्वाङले छानविनका लागि माग गरिसकेका छन् । त्यति मात्रै नभएर एन्फा मुख्यालय अगाडिको प्रशिक्षक र दुई पत्रकारको चुरोट प्रक्ररणले पनि आजको बैठकमा स्थान पाउने लगभग निश्चित छ ।

त्यतिमात्रै नभएर बिहीबार प्रशिक्षक अब्दुल्लाह अलमुताइरीले पनि उपाध्यक्ष नेम्वाङ र दुई पत्रकारमाथि छानविनको माग गर्दै एन्फालाई पत्र बुझाएका थिए । त्यसैले आजको बैठकले छानविन समितिको बनाउने सम्भावना पनि देखिन्छ ।

१५,श्रावण.२०७८,शुक्रबार १२:५१ मा प्रकाशित

प्रतिक्रिया दिनुहोस्