एफसी कटेजमा छापा मार्दा भागेका पाँच जना पक्राउ

कैलाली । कैलालीको धनगढी उपमहानगरपालिका–३ को एफसी कटेजमा प्रहरीले छापा मार्दा भागेका पाँच जनालाई पक्राउ गरिएको जिल्ला प्रहरी कार्यालय कैलालीले जनाएको छ ।

उक्त कटेजमा जुवा खेलाइरहेको भन्ने सूचनाका आधारमा साउन १८ गते प्रहरीले छापा मार्दा निजहरु सिसाको ढोका फुटाएर प्रहरीलाई छल्दै भागेका थिए । प्रहरीका अनुसार एफसी कटेजका सञ्चालक ३७ वर्षीय सुरेन्द्र बहादुर ऐर, कैलालीको गोदावरी नगरपालिका–२ बस्ने वर्ष ४७ का महेन्द्र भट्टराई, धनगढी उपमहानगरपालिका–२ बस्ने वर्ष ३८ को पवन भाट, मिलनचोक बस्ने युवराज भण्डारी र गोदावरी नगरपालिका–२ बस्ने वर्ष ३५ का पदम साउदलाई पक्राउ गरी जुवा शीर्षकमा मुद्दा दर्ता गरी अनुसन्धान भइरहेको प्रहरी उपरीक्षक विश्व अधिकारीले जनाए ।

अन्य फरार ५ जनाको खोजी भइरहेको प्रहरीले जनाएको छ । प्रहरीले कटेज खानतलासी गर्दा फोहोर फालेको कार्टुनमा ८५ हजार रुपैयाँ बरामद गरेको प्रहरी उपरीक्षक अधिकारीको भनाइ छ ।