प्रदेश २ : जनलोकपाल आयोग गठन, सत्ता साझेदार दल असन्तुष्ट

धनुषा । प्रदेश २ सरकारले नवगठित जनलोकपाल आयोगका अध्यक्ष र दुई सदस्य नियुक्त गरेको छ । मुख्यमन्त्री लालबाबु राउतले आफ्नो मातहतमा रहने गरी जनलोकपाल आयोग गठन गरी अध्यक्ष र दुई सदस्यलाई नियुक्त गरेका हुन् ।

मुख्यमन्त्री राउतले आयोगको अध्यक्षमा रौतहटका कानुन व्यवसायी रामसहाय प्रसाद यादव र सदस्यहरूमा धनुषाका जिल्ला प्राविधिक कार्यालयका पूर्व डिई राजकिशोर साह र महोत्तरीकी शोभा महतोलाई नियुक्त गरेका हुन् । उनको यो निर्णयपछि सत्ता गठबन्धनमा असन्तुष्टि चुलिएको छ । सत्तारुढ नेपाली काँग्रेसले आफूहरुलाई जानकारी नै नदिइ नियुक्ति गरिएको भन्दै असन्तुष्टि जनाएका छन् ।

मुख्यमन्त्री राउतले प्रदेश सरकारमा सहभागी काँग्रेस र नेकपा माओवादी केन्द्रलाई बेवास्ता गरे पनि नेकपा एकीकृत समाजवादीलाई भने जनलोकपाल आयोगमा समेटेका छन् । नेकपा एकीकृत समाजवादीका नेता शत्रुधन महतोसँग मुख्यमन्त्री राउतले छलफल गरी सो पार्टीको सिफारिसमा शोभा महतोलाई सदस्यमा नियुक्त गरेका छन् । अध्यक्षमा नियुक्त यादव र सदस्यमा नियुक्त साह भने जनता समाजवादी पार्टी (जसपा) का हुन् ।

नेकपा एकीकृत समाजवादीका नेता महतोले जनलोकपाल आयोगमा नियुक्तिका लागि मुख्यमन्त्रीसँग छलफल भएको र सोही अनुसार आफुले सिफारिससमेत गरेको बताए । नेपाली काँग्रेसका नेता तथा भौतिक पूर्वाधार विकास मन्त्री रामसरोज यादवले राजनीतिक नियुक्तिका लागि प्रदेश सरकारले सत्ता साझेदार दलसँग परामर्श गरी सहमतिका आधारमा अघि बढ्नुपर्ने खाँचो औंल्याए ।

प्रदेश सरकारको विभिन्न विकास निर्माण कार्यदेखि मन्त्रालय तथा सांसदको गतिविधिसम्मको अनुगमन तथा कारवाहीका लागि मुख्यमन्त्रीलाई प्रतिवेदनसहित सिफारिस गर्नेसम्मको अधिकार जनलोकपाल आयोगलाई छ ।

यो पनि पढ्नुहोस  ह्रृदयदेखिको कामना यत्ति छ रवि लामिछाने निर्दोष सावित हुन् : रवीन्द्र मिश्र
२४,भाद्र.२०७८,बिहीबार १४:५६ मा प्रकाशित

प्रतिक्रिया दिनुहोस्

%d bloggers like this: