आफूखुसी पदाधिकारी मनोनीत गरेको भन्दै लोसपा कार्यालयमा आज पनि धर्ना

काठमाडौं । लोकतान्त्रिक समाजवादी पार्टी नेपाल धनुषाका नेता तथा कार्यकर्ताले केन्द्रीय पार्टी कार्यालयमा आज पनि धर्ना दिएका छन् ।

अध्यक्ष महन्थ ठाकुरले मनोमानी ढंगले प्रदेश र जिल्लाहरूमा पदाधिकारी चयन गरेको भन्दै आइतबारदेखि जारी धर्नालाई आज पनि निरन्तरता दिइएको हो । लोसपा कार्यकर्ता बिन्दु ठाकुरले अध्यक्षले गरेको निर्णय स्वीकार्न नसकिने भन्दै सच्याउन माग गरे । ‘एक व्यक्ति एक पद’ को कुरा पार्टीमा लागू गरेर पार्टीलाई सबल बनाउनुपर्ने आफूहरूको जोड रहेको उनको भनाइ छ ।

ठाकुरले भने, ‘हाम्रो अध्यक्षज्यूबाट जुन खालका निर्णय भयो । जस्तै प्रदेश अध्यक्षमा र जिल्ला अध्यक्ष । प्रदेश सचिव, जिल्लाको पर्यवेक्षक तथा अन्य मनोनीत पदमा हाम्रै साथीहरूलाई नियुक्ति गर्नुभएको छ । धेरै साथीहरू उहाँको निर्णयबाट असन्तुष्ट हुनुहुन्छ । निर्णयलाई सच्याउनुस् । वान म्यान वान पोष्टको कुरा पार्टीमा लागू गरेर पार्टीलाई सबल बनाउने खालका निर्णय गर्नुस् । पार्टीमा मनोमानी किसिमले मनोनीत गर्न मिल्दैन ।’

१२,पुष.२०७८,सोमबार १७:३१ मा प्रकाशित

प्रतिक्रिया दिनुहोस्