कैलाली । सुदूरपश्चिम सरकारले दरबन्दी परिपूर्तिका लागि कर्मचारी भर्ना गर्ने भएको छ ।

प्रदेश मन्त्रिपरिषद्को बैठकले विज्ञापन खोल्न प्रदेश लोकसेवा आयोगलाई अनुरोध गर्ने निर्णय गरेको हो ।

आज (बिहीबार) बसेको प्रदेश मन्त्रिपरिषद्को बैठकले तहगत कायम गर्दै रिक्त पदमा पदपूर्ति गर्न आयोगलाई लेखी पठाउने निर्णय गरेको छ ।

सङ्घीय सरकारको स्वीकृत दरबन्दीअनुसार प्रदेशको मन्त्रालय र मातहतका निकायमा रिक्त दरबन्दीमा कर्मचारी भर्ना गर्न लोकसेवालाई आग्रह गर्ने निर्णय भएको सरकारको प्रवक्तासमेत रहेकी आन्तरिक मामिला तथा कानूनमन्त्री पूर्णा जोशीले बताइन् ।

‘नेपाल सरकारले सुदूरपश्चिम सरकारका लागि दरबन्दी श्रेणीगत पठाएको छ, कर्मचारी समायोजन अनुसार प्रदेशमा समायोजन नहुने विशिष्ट श्रेणी प्रमुख सचिव, सङ्घीय ऐन बमोजिमबाट पूर्ति हुने पदबाहेकलाई तहगत कायम गरी कर्मचारीको दरबन्दीको सीमाभित्र रही दरबन्दी स्वीकृत गर्ने भन्ने निर्णय भएको छ,’ जोशीले भनिन् ।

उनका अनुसार रिक्त दरबन्दी पूर्तिका लागि मन्त्रालयले ७ दिनभित्र माग गरेर लोकसेवा आयोगमा पठाउने निर्णय भएको छ ।

केन्द्र सरकारले सुदूरपश्चिममा २३८० जनाको दरबन्दी तोकेको छ । तर, प्रदेश सरकार गठन भएको ४ वर्ष सम्म पनि करिब ४३ प्रतिशत कर्मचारीको अभाव छ ।