Friday 26th of April 2024
काठमाडौं । युक्रेनमा रहेका नेपालीलाई तत्काल उद्दार गर्नुपर्ने अवस्था नरहेको परराष्ट्र मन्त्रालयले जनाएको छ ।
रुस र युक्रेनबीचको तनावबाट सिर्जित परिस्थितीलाई नजिकबाट नियालिरहेको समेत मन्त्रालयले जनाएको छ ।
युक्रेन नियोग हेर्ने जर्मनीका लागि नेपाली राजदूत रामकाजी खड्काले मन्त्रालयको युरोप-अमेरिका हेर्ने महाशाखालाई युक्रेन संकटबारे ब्रिफिङ गरेका छन् ।
तत्कालै उद्दार गर्नुपर्ने र सहायता उपलब्ध गराउनुपर्ने अवस्था नरहेको भन्दै खड्काले ब्रिफिङ गरेको मन्त्रालय स्रोतले जानकारी दिएको छ । ‘अहिलेसम्म नेपालीहरु दूतावासमा सहयोग चाहियो भनेर आएका छैनन् र हामी पनि एनआरएनए लगायतका संस्थासँगको सम्पर्कमा छौं’ राजदूत खड्काले गरेको ब्रिफिङबारे मन्त्रालयका एक अधिकारीले भने ।
परराष्ट्रको तथ्यांकअनुसार अहिले युक्रेनमा झन्डै एकसय जना नेपाली रहेका छन् जसमध्ये ३० जना ब्यापारमा संलग्न छन् । अन्य भने युक्रेन हुँदै युरोप छिर्ने उद्देश्यले त्यहाँ पुगेका नेपालीहरु छन् ।
रुसले युक्रेन सीमामा डेढलाख संख्यामा सैनिक र भारी ट्यांकहरु खडा गरेपछि रुस र पश्चिमा मुलुकको सम्बन्धमा तनाव सिर्जना भएको छ । अमेरिकासहितको नेटो गठबन्धनले रुसले युक्रेनमा आक्रमण गर्ने सम्भावना अझै उच्च रहेको समेत बताइरहेको छ ।
प्रतिक्रिया दिनुहोस्