काठमाडौं । आईसीसी टी-२० ग्लोबल क्वालिफायरअन्तर्गत समूहको दोस्रो खेलमा नेपालले अहिले फिलिपिन्ससँग खेल्दैछ । टस हारेपछि नेपालले ब्याटिङ फिलिपिन्सविरुद्ध ब्याटिङ गरिरहेको छ ।

पहिलो खेलमा शुक्रबार ओमानलाई ३९ रनले हराएको नेपाल लगातार दोस्रो जितका लागि खेलिरहेको छ । खेल ओमानको मस्कटस्थित अल अमेरात रंगशालामा भइरहेको छ ।

आज नेपालले फिलिपिन्सविरुद्धको खेलमा दुई जना खेलाडी परिवर्तन गरेको छ ।

कमल सिंह ऐरी र विवेक यादवको स्थानमा कुशल मल्ल र गुलशन झा पहिलो रोजाइमा परेका छन् । गुलशनले आजकै खेलबाट टी-२० आईमा डेब्यु गरेका हुन् ।

ग्लोबल क्वालिफायरको नवआगन्तुक टोली फिलिपिन्सले भने शुक्रबार भएको आफ्नो पहिले खेलमा क्यानडासँग ११८ रनको फराकिलो हार ब्यहोरेको थियो ।

फिलिपिन्सलाई हराउन सकेमा नेपालले सेमिफाइनल यात्रा लगभग निश्चित गर्नेछ । नेपाल र फिलिपिन्सबीच खेल भएकै समयमा यही समूहका क्यानडा र ओमानबीच पनि खेल हुनेछ ।

नेपाल र क्यानाडाले आआफ्नो खेलमा आफू अनुकूल नतिजा निकालेका अवस्थामा यो समूहबाट सेमिफाइनलमा पुग्ने टोलीको टुंगो आजै लाग्नेछ ।