एमसीसीलाई संसदीय समितिमा पठाउन दाहालको आग्रह, प्रक्रियामा लैजाने प्रधानमन्त्रीको अडान

काठमाडौँ । एमसीसी संसद्‍मा टेबल गर्ने विषयमा सत्तारुढ गठबन्धनभित्र समझदारी भएपनि त्यसपछिको प्रक्रिया कसरी अगाडि बढाउने भन्ने विषयमा भने प्रधानमन्त्री शेरबहादुर देउवा र माओवादी केन्द्रका अध्यक्ष पुष्पकमल दाहालबीच मतभेद देखिएको छ ।

सत्तारुढ गठबन्धनको आइतबार बालुवाटारमा बसेको बैठकमा संसद्‍मा एमसीसीबारे पार्टीगत धारणा राख्ने सहमति भएको हो । माओवादी केन्द्रका अध्यक्ष दाहालको सचिवालयले एमसीसीबारे गठबन्धनमा भएको छलफलपछि भनेको छ, ‘अध्यक्ष प्रचण्डले कुनै पनि विधेयक सरकारको तर्फबाट सदनमा टेबल गर्नु सैद्धान्तिक हिसाबले स्वाभाविक प्रक्रिया भएपनि हाल लामो समयदेखि सदन अवरुद्ध भएको र अरु कुनैपनि विधेयक टेबल नभएको अवस्थामा सभामुखलाई एमसीसी मात्र टेबल गर भन्नु उपयुक्त नहुने कुरा प्रष्ट गर्नुभयो ।’

एमसीसी टेबुल गर्ने भए छलफलका लागि संसदीय समितिमा पठाउनुपर्ने दाहालले आग्रह गरेको बताइएको छ । ‘यदी तपाईं टेबल गरिछाड्ने हो भने प्रस्तावलाई छलफलको लागि समितिमा पठाउन आग्रह गर्नुभयो तर प्रधानमन्त्री भने टेबुल गरेर प्रक्रियामा लैजाने अडानमा रहनु भएको छ,’ दाहालको सचिवालयले भनेको छ ।

त्यस्तो अवस्थामा संसद्‍मा आ-आफ्नो धारणा राख्ने कुरा दाहालले बैठकमा राखेका थिए । त्यस कुरामा प्रधानमन्त्री देउवा पनि सहमत भएको बताइएको छ ।