गङ्गालाल अस्पतालका ल्याब इन्चार्जविरुद्ध आरोपपत्र दायर

काठमाडौँ । अख्तियार दुरुपयोग अनुसन्धान आयोगले काठमाडौँको बाँसबारीस्थित शहीद गङ्गालाल राष्ट्रिय हृदय केन्द्रका तत्कालीन ल्याब इन्चार्ज विनोदकुमार यादवविरुद्ध आरोपपत्र दायर गरेको छ ।

इन्चार्ज यादवले नक्कली पीसीआर रिपोर्ट बनाएको पुष्टि भएपछि आज (सोमबार) विशेष अदालत काठमाडौँमा आरोपपत्र दायर गरिएको अख्तियारका सहायक प्रवक्ता वेदप्रसाद भण्डारीले जानकारी दिए ।

केन्द्रका तत्कालीन ल्याब इन्चार्ज यादवले पीसीआर टेस्टको रिपोर्ट फेरबदल गरी लामो समयदेखि अनुचित लेनदेन गरेको भन्ने उजुरी परेपछि अख्तियारले उनीमाथि अनुसन्धान सुरु गरेको थियो ।

अनुसन्धान हुँदा यादवले अस्पतालको छाप आफूखुसी बनाइ दुरुपयोग गर्ने गरेको पाइएको अख्तियारद्वारा सोमबार जारी विज्ञप्तिमा उल्लेख छ ।

यादवले प्रयोग गर्ने कार्यालयको कम्प्युटरको सिपियुको फरेन्सिक परीक्षण गर्दा फेला परेका पीसीआर रिपोर्टहरू सबै नक्कली भएको समेत अख्तियारले जनाएको छ ।

भर्ना भएका बिरामीहरूको स्वाब सङ्कलन गरी अनधिकृतरूपमा रकम लिई स्वाबको परीक्षण नै नगरी गलत पीसीआर प्रतिवेदन उनले बनाउने गरेको अनुसन्धानमा खुलेको छ ।

रिपोर्ट पोजेटिभ आएमा पनि थप रकम लिई पुन: नेगेटिभ बनाउन गरेको अख्तियारको ठहर छ ।