Saturday 14th of June 2025
हेटौँडा । नेपाली कांग्रेसका वरिष्ठ नेता रामचन्द्र पौडेलले कम्युनिष्टहरू मिलेर कांग्रेसलाई एक्लो बनाउने षड्यन्त्र सुरू भएको बताएका छन् ।
नेपाल प्रेस युनिएनको नवौँ राष्ट्रिय अधिवेशनको उद्घाटन सत्रलाई आज हेटौँडामा सम्बोधन गर्दै नेता पौडेलले राष्ट्रिय तथा अन्तर्राष्ट्रिय तत्व मिलेर नेपाली कांग्रेसलाई एक्लो बनाउने प्रयास भइरहेको आशंका व्यक्त गरे ।
‘एकातिर नेपाली कांग्रेसभित्र पनि कम्युनिष्टसँग मिल्नु हुँदैन भन्नेहरू छन्, अर्कोतिर माओवादीभित्र पनि एकथरी हामी कम्युनिष्ट एकता गर्नुपर्छ भन्ने नारा अहिले लगाइरहेका छन्, समाजवादीभित्र पनि कम्युनिष्ट एकता गर्नुपर्छ भनेर दौडिरहेका छन्’, पौडेलले भने, ‘अन्तर्राष्ट्रिय शक्ति पनि कम्युनिष्टलाई एकैठाउँमा राखी नेपाली कांग्रेसलाई एक्लो पारेर गठबन्धन गराउने कोसिस भइरहेका छन् ।’
नेपाली कांग्रेसलाई एक्लो र कमजोर पार्ने गरी महागठबन्धनको प्रयास भइरहेको भन्दै पोडेलले कांग्रेस आफ्नो लक्षमा स्पष्ट हुनुपर्ने बताए ।
कांग्रेसले आफ्नो नीति विधिलाई कायम गरेर मात्र गठबन्धन गरेको बताउँदै उनले यो वास्तवमा चुनावी तालमेल मात्र रहेको बताए । कांग्रेसले चुनावी तालमेलको लागि मात्र गठबन्धन गरेको र यसलाई आउँदो निर्वाचनसम्म लैजानुपर्नेमा पौडलको जोड थियो ।
स्थायित्व, सामजिक न्याय र विकासको लागि गठबन्धन आवश्यक रहेको भन्दै पौडेलले तालमेलबाट नेपाली कांग्रेसलाई घाटा नभएको बताए । कम्युनिष्टले बहुमत ल्याएर पनि देशलाई चलाउन नसकेकोले कांग्रेस नेतृत्वको गठबन्धन आजको आवश्यकता रहेको उनको भनाइ छ । कांग्रेसभित्र एकता कायम नभएसम्म सोचेको सफलता प्राप्त नहुने बताउँदै उनले आफूभित्रको एकता कायम गर्नको लागि प्रेस युनियनलाई समेत अनुरोध गरे ।
प्रतिक्रिया दिनुहोस्