चितवन छाडेर गोरखा रोजेका प्रचण्ड चुनावी माहोल बनाउन व्यस्त

काठमाडौं । आगामी निर्वाचनका लागि गोरखा २ मा उम्मेदवारी दर्ता गरेका नेकपा माओवादी केन्द्रका अध्यक्ष पुष्पकमल दाहाल प्रचण्ड चुनाव केन्द्रित छलफलमा जुटेका छन् । २०७४ सालमा जितेको चितवन ३ छाडेर गोरखा २ रोजेका प्रचण्ड चुनावी माहोल बनाउनमा व्यस्त भएका हुन् ।

नेपाल समाजवादी पार्टीका अध्यक्ष डा. बाबुराम भट्टराई र पार्टी वरिष्ठ उपाध्यक्ष नारायणकाजी श्रेष्ठलाई साथ लिएर गोरखाबाट उम्मेदवारी दिएका प्रचण्ड चुनावी रणनीति बनाउन व्यस्त छन् । गोरखा नेसपा अध्यक्ष भट्टराई र वरिष्ठ उपाध्यक्ष श्रेष्ठको गृहजिल्ला हो ।

२०७४ को निर्वाचनमा नेता श्रेष्ठलाई हराउँदै कांग्रेसको सहयोगमा पूर्वप्रधानमन्त्री डा. भट्टराईले जितेका थिए ।

प्रचण्डले सोमबार बिहानैदेखि गोरखाका पार्टी र गठबन्धनका नेताहरूसँग छलफल थालेका छन् । उनले गोरखाका पार्टी केन्द्रीय सदस्यहरूसँग जिल्लाको समग्र चुनावी अवस्थाबारे जानकारी लिएलगत्तै गठबन्धनमा रहेका दलका नेताहरूसँग पनि छलफल गरेका हुन् ।

छलफलमा प्रतिनिधिसभातर्फ गोरखा १ मा उम्मेदवार बनेका कांग्रेसका राजेन्द्र बजगाईं, प्रदेशसभाअन्तर्गतका सुरेन्द्रराज पाण्डे र कांग्रेस जिल्ला सभापति नन्दप्रसाद न्यौपाने, माओवादीबाट प्रदेशसभा उम्मेदवार कृष्ण धिताललगायत नेताहरुसँग छलफल गरेका छन् ।

हरेक पटक निर्वाचन क्षेत्र परिवर्नत गर्ने प्रचण्डलाई नेसपाका अध्यक्ष डा भट्टराई र पार्टी वरिष्ठ उपाध्यक्ष श्रेष्ठले जोडबल गरेर गोरखा लगेका हुन् ।

प्रचण्ड २०६४ को पहिलो संविधानसभा निर्वाचनमा रोल्पा र काठमाडौं १० बाट निर्वाचित भएका थिए । तर, २०७० को निर्वाचनमा पुरानो निर्वाचन क्षेत्र छोडेर सिरहा ५ रोजेका थिए ।

२०७४ को निर्वाचनमा सिरहाबाटै चुनाव लड्न एकल सिफारिस गरिएको भए पनि उनले चितवन ३ रोजेका थिए । अहिले चितवन ३ भन्दा गोरखा २ मा जीत सहज देखेकाले प्रचण्डको नजर यहाँ परेको हो ।

२४,आश्विन.२०७९,सोमबार ११:४४ मा प्रकाशित

प्रतिक्रिया दिनुहोस्