देउवा सरकारले छिमेकी देशसँगको सम्बन्धलाई तनावपूर्ण बनायो, हामी सच्याउँछौं : ओली

काठमाडौँ । नेकपा एमाले अध्यक्ष केपी शर्मा ओलीले शेरबहादुर देउवा नेतृत्वको पूर्ववर्ती सरकारले छिमेकी देशसँगको सम्बन्धलाई तनावपूर्ण बनाउने काम गरेको आरोप लगाएका छन् । एमालेको परराष्ट्र मामिला विभागले आयोजना गरेको अभिमुखीकरण कार्यक्रमलाई सम्बोधन गर्दै अध्यक्ष ओलीले एक देशसँग नजिक हुन अर्को देशसँगको सम्बन्धमा कृत्रिम रुपमा तनाव बढाएको बताए ।

‘छिमेक सम्बन्धलाई कृत्रिम रुपमा तनाव बढाउने काम भयो । अर्काको निम्ती त्यस्तो गरियो । गैरजिम्मेवार प्रवृत्ति देखा परे । हाम्रो जस्तो भूराजनीतिक अवस्थिति भएको देशमा धेरै खतरनाक हुन्छ,’ ओलीले भने । ओलीले कुन देशकाविरुद्ध देउवाले त्यसो गरेको हो भन्ने उल्लेख गरिकनै नयाँ सरकारले त्यसलाई ठिक गर्ने बताए ।

‘हामी एउटा कार्ड एउटातिर अर्कोको कार्ड अर्कोतिर होइन । हामीले सन्तुलित, विश्वसनीय होइन । भित्रभित्र एउटा कुरा बाहिर, बाहिर अर्को कुरा होइन । मुखले एउटा व्यवहारमा अर्को गर्ने अभ्यास, त्यस प्रकारको होइन, भरपर्दो, विश्वसनीय, जो भनिन्छ त्यो गर्ने होइन । एउटा हित र अर्काको अहित गर्ने होइन, छिमेकमा बसेर अर्काको अहित गर्ने भन्ने विषय सामान्य गाउँघरमा पनि असल छिमेकी मानिँदैन,’ ओलीले भने ‘हामी छिमेकीहरुका लागि असल छिमेकी हुन चाहान्छौँ उनीहरुको कुभलो गर्दैनौं, विल्कुलै कुभलो नगरिकन उनीहरुको भलो चिताएर उनीलाई सहयोग पुर्‍याएर, उनीहरुको जायज चासो चिन्ता सरोकार आदिलाई समेत सम्बोधन गरेर यथोचित ढंगले हामी अघि जान्छौं ।’

उनले नेपालको भूमि कसैको प्रयोग गर्न नदिने र सैन्य रुपमा कतै संलग्न नहुने उल्लेख गरे । ‘हामी कसैको पनि सैनिक शिविर, कुनै प्रकारको सैनिक गतिविधिहरु वा अड्डाहरु हाम्रो देशमा राख्न दिँदैनौं । कसैको पनि राख्यो भने हाम्रो लागि अहितकर हुन्छ हाम्रो सार्वभौम सत्तामाथिको अतिक्रमण हुन्छ । कुनै पनि हाम्रो सार्वभौमसत्ता, स्वाधिनतामा कुनै प्रकारको सम्झौता गर्दैनौं र परस्परिक लाभ र सम्मानको आधारमा सम्बन्ध राख्छौं,’ ओलीले भने । उनले नेपालले विकासशील देशमा नेपाल स्तरोन्नति गर्ने निर्णय भएपनि पछिल्लो समयमा अर्थतन्त्रमा समस्या देखिएको बताए ।

‘हामी विकासशील स्तरोन्नति गर्ने निर्णय थियो । यो डेढ वर्षमा अर्थतन्त्र जसरी ओरालो लाग्यो, सूचकहरु डर लाग्यो जस्तो गरी ओरालो लागे, जस्तो कृत्रिम ढंगले महंगी वृद्धि भयो, युक्रेन युद्धको मात्रै कुरा होइन । युक्रेन युद्धलाई देखाएर आफ्नो असक्षमता र बदमासीलाई छोप्ने काम भयो । युक्रेन युद्ध हुँदैमा हाम्रो अर्थतन्त्र यति झर्नुपर्ने अवस्था हुँदैन,’ उनले भने, ‘हाम्रो युद्धसँग जोडिएको होइन । पेट्रोलियम पदार्थको भाउ बढ्यो होला त्यसलाई कसरी समाधान गर्ने भनेर अन्तरिक रुपमा केही गर्नुपर्ने थियो होला त्यतातर्फ ध्यान दिइएन । ‘