मछिन्द्र र जावलाखेलको गोलरहित बराबरी, चर्च ब्वाइजलाई फाइदा

काठमाडौं । शहीद स्मारक ए डिभिजन लिगमा बुधबार मछिन्द्र एफसी र जावलाखेल युथ क्लबले बराबरी खेल्दै अंक बाँडेका छन् ।

त्रिपुरेश्वरस्थित दशरथ रंगशालमा भएको खेलमा दोस्रो स्थानको मछिन्द्र र तेस्रो स्थानको जावलाखेलले गोलरहित बराबरी खेलेका हुन् ।

यस बराबरीले अंकतालिकामा दुवै टोलीको स्थान यथावत छ भने लिग लिडर चर्च ब्वाइज युनाइटेडलाई फाइदा पुगेको छ ।

लिगको पहिलो चरणमा जावलाखेलले मछिन्द्रलाई ३-१ ले पराजित गरेको थियो ।

२१ खेलबाट मछिन्द्रको ३५ अंक हुँदा जावलाखेलको उति नै खेलबाट ३४ अंक छ । एक खेल कम खेलेको चर्च ब्वाइज शीर्ष स्थानमा छ ।

बिहीबार चर्च ब्वाइजले च्यासल मैदानमा मनाङ मर्स्याङ्दी क्लबसँग खेल्दैछ र उक्त खेल जितेमा चर्च ब्वाइजले शीर्ष स्थानमा ५ अंकको अग्रता बनाउनेछ ।