उपेन्द्रले भवन शिल्यान्यास गर्न लागेपछि कृषि विश्वविद्यालयमा जनमतका कार्यकर्ताले लगायो ताला

जनकपुर । सत्ता साझेदार जनमत पार्टीका कार्यकर्ताले कृषि विश्वविद्यालयमा ताला लगाएका छन् ।

विश्वविद्यालयमा राजनीतिकरण रोक्नुपर्ने, डीपीआरमा भ्रष्टाचार भएकाले छानबिन गर्नुपर्ने, परीक्षा बोर्डबिनै लिइएको परीक्षाको छानबिन गर्नुपर्ने लगायत माग राखेर जनमतका कार्यकर्ताले विश्वविद्यालयमा ताला लगाएका हुन् ।

‘विश्वविद्यालयलाई देखाएर जसपाले आफ्नो राजनीति गरिरहेको छ । हामी विश्वविद्यालय बनोस् भन्ने हाम्रो माग हो’, जनमतका केन्द्रीय सचिव बीपी साहले भने ।

मधेश प्रदेश सरकारबाट सञ्चालित कृषि विश्वविद्यालयको भवन भोलि शिल्यान्यास कार्यक्रम तय भएको छ । उक्त भवन शिल्यान्यास जनता समाजवादी पार्टी (जसपा) का अध्यक्ष उपेन्द्र यादवले गर्ने तयारी छ ।

तर भवन शिल्यान्यासकै विषयमा मधेश प्रदेशका मुख्यमन्त्री सरोजकुमार यादव र शिक्षा तथा संस्कृति मन्त्री महेशप्रसाद यादवबीच समेत मतभेद देखिएको छ ।
मुख्यमन्त्री यादवले आफ्नै अध्यक्ष उपेन्द्र र शिक्षामन्त्री यादवले पनि आफ्नै अध्यक्ष सिके राउतलाई प्रमुख अतिथि बनाउने पक्षमा छन् ।

‘भोलि शिल्यान्यास नगर्नुहोस् भनेको छु । सरकारमा सहभागी दलहरुबीच छलफल गरेर अगाडि बढाउनुपर्छ’, शिक्षामन्त्री यादवले भने । तर, विश्वविद्यालयका रजिस्ट्रार भगवान ठाकुरले मुख्यमन्त्री यादवको निर्देशन मानेर विश्वविद्यालय भवन शिल्यान्यास कार्यक्रम राखेका छन् ।

यो विश्वविद्यालयको भवन उपेन्द्र यादव र सिके राउतकै क्षेत्र (सप्तरी–२) मा शिल्यान्यास हुँदैछ । राजविराज नगरपालिका-१३ मा बन्ने विश्वविद्यालय भवनको शिल्यान्यास उपेन्द्रले प्रमुख अतिथि भएर हुने भएपछि जनमत पार्टी रोक्न लागि परेको छ ।

‘यो क्षेत्रको माननीय सिके राउत हो । अनि हारेको व्यक्तिलाई प्रमुख अतिथि बनाएर शिल्यान्यास हुन सक्दैन’, जनमतका एक नेताले भने ।

७,माघ.२०८०,आईतवार १५:०१ मा प्रकाशित

प्रतिक्रिया दिनुहोस्