एमालेमा जिल्ला अधिवेशनको सरगर्मी : नेता सहमतिको रटानमा, कार्यकर्ता निर्वाचनकै मुडमा

कैलाली । सातै प्रदेशको अधिवेशन सम्पन्न गरिसकेको एमालेमा अहिले जिल्ला अधिवेशनको चटारो सुरू भएको छ । एमाले अध्यक्ष केपी शर्मा ओलीले सबै प्रदेशमा सर्वसम्मत नेतृत्व चयनको प्रयास गरे पनि केहीमा बाहेक त्यो प्रयास सार्थक देखिएन ।

सात प्रदेशमध्ये सुदूरपश्चिम र मधेस प्रदेशबाहेकका प्रदेश कमिटी निर्वाचनमार्फत आए । निर्वाचन भएका प्रदेशमा उपाध्यक्ष विष्णु पौडेल र महासचिव शंकर पोखरेलको गुट भन्दै चुनावमा होमिए । कतै उपाध्यक्ष भारी देखिए कतै महासचिव । प्रदेश अधिवेशनजस्तै अहिले जिल्ला अधिवेशनहरू पनि सर्वसम्मतभन्दा बढी निर्वाचनमार्फत नै टुङ्गो लागिरहेका छन् ।

प्रारम्भिक अवस्थामा एमालेले देशैभर ७ जिल्लामा मात्रै अधिवेशन गरेको छ । तीमध्ये तीन जिल्लामा सर्वसम्मत नेतृत्व चयन गरिएको छ भने अन्य चार जिल्लामा निर्वाचन भएका छन् ।

सुदूरपश्चिमको दार्चुलामा पुस २० गते सर्वसम्मत नेतृत्व चयन गरिएको थियो । ९ जिल्ला रहेको यहाँ त्यसयता अधिवेशन भएको छैन । कैलालीमा भने आगामी ६ र ७ गते जिल्ला अधिवेशन हुँदैछ । बिहीबार उक्त अधिवेशनको लागि आफ्नो उम्मेदवारीका विषयमा पार्टीलाई लिखित जानकारी गराउने प्रक्रिया सुरू गरिएको थियो । अध्यक्षमा तीनजनासहित पाँच पदाधिकारीमा ५० जनाले दाबी गरेका छन् ।

आकाङ्क्षी बढी हुँदा कैलालीमा पनि निर्वाचन हुने सम्भावना बढेको छ । प्रदेश अधिवेशन भने सर्वसम्मत नेतृत्व चयन गर्दै सकिएको थियो । कर्णालीमा प्रदेश अधिवेशनमा निर्वाचन भएको थियो । १० जिल्लामध्ये अहिलेसम्म दैलेखमा मात्रै सर्वसम्मत नेतृत्व चयन गरिएको छ । अन्य जिल्लामा अधिवेशन हुन बाँकी छ ।

मधेस प्रदेशका ८ जिल्लामध्ये रौतहट र महोत्तरीमा निर्वाचनमार्फत नेतृत्व चुनिएको छ । यहाँ प्रदेश नेतृत्व सर्वसम्मत टुङ्गिएको थियो ।

बागमतीका १३ जिल्लामध्ये दोलखामा चुनाव भएको थियो भने बिहीबार धादिङमा निर्वाचन सम्पन्न भइसकेको छ । सिन्धुपाल्चोकमा पनि १६ देखी १८ गते सम्म अधिवेशन तोकिएको छ । यहाँ पनि सर्वसम्मत नेतृत्व चयन हुने सम्भावना न्यून रहेको प्रदेश उपसचिव भक्तकुमारी लामाले बताइन् । उनका अनुसार बागमतीका अन्य जिल्लामा पनि सर्वसम्मतको सम्भावना क्षीण छ ।

गण्डकीमा प्रदेश अधिवेशन प्यानल सहित प्रतिस्पर्धामा उत्रिएर हारजित हुँदा म्याग्दीमा भने सर्वसम्मत नेतृत्व चयन गरिएको छ । अन्य जिल्लामा भने अधिवेशन हुन बाँकी छ ।

लुम्बिनी प्रदेशमा फागुनदेखि जेठसम्ममा जिल्ला अधिवेशन सक्ने तयारी छ । प्रदेश नेतृत्व निर्वाचनमार्फत टुङ्गो लागेको थियो ।

कोशी प्रदेशका कुनै पनि जिल्लामा अधिवेशन सुरू भएको छैन ।

एमाले संगठन विभाग प्रमुख काशीनाथ अधिकारीले निर्वाचनमार्फत नेतृत्व चयन गर्न वा सर्वसम्मत ढङ्गले नेतृत्व चयन गर्ने विषयमा केन्द्रीय नेतृत्वबाट कुनै दबाब नआउने स्पष्ट पारेका छन् । उनले जिल्लाहरूको तयारी अनुसार नै अधिवेशनहरू भइरहेको र त्यही अनुसार नै हुने दाबी गरे ।

‘नेतृत्वबाट सहमति नै गर्नुपर्छ वा निर्वाचनमै जानु पर्छ भन्ने कुनै दबाब आउँदैन’, उनले भने, ‘जिल्लाका नेता कार्यकर्ताहरूको भावनाअनुसार नै अधिवेशन भइरहेका छन् यस्तै हुन्छ ।’

‘प्रदेश अधिवेशनमा त सहमतिमा दबाब दिँदा दिँदै पनि निर्वाचनमा गएको देखियो नि ?’ उनी भन्छन् ‘प्रदेशमा पनि नेताहरूबाट त्यस्तो दबाब थिएन कार्यकर्ताहरूकै भावनाअनुसार अगाडि बढेको हो ।’

४,फाल्गुन.२०८०,शुक्रबार ०९:४३ मा प्रकाशित

प्रतिक्रिया दिनुहोस्