इन्कारी बयान दिएका रविलाई ७० वटा लिखित प्रश्न, भोलिमात्रै पोखरा पठाइने तयारी (भिडियो सहित)

काठमाडौं । रास्वपाका सभापति एवम् पूर्वगृहमन्त्री रवि लामिछानेको रुपन्देहीमा बयान ढिलासम्म चलेपछि आज उनलाई पोखरा नफर्काइने भएको छ ।

उनलाई शुक्रबार बिहान जहाजमार्फत पोखरा लगिने रुपन्देही प्रहरीले जानकारी दिएको रास्वपाका नेता दीपक बोहोराले जानकारी दिए । लामिछानेलाई ७० वटा प्रश्न सोधेर बयान लिइएको बताइएको छ ।

रास्वपा सभापति तथा पूर्व गृहमन्त्री रवि लामिछानेको रूपन्देहीमा तीन दिनको बयान सकिएको छ ।

पहिलो दिन मौखिक प्रश्नको जवाफ र दोस्रो र तेस्रो दिन ७० भन्दा बढी लिखित प्रश्नको जवाफमा उनले सहकारी ठगीमा संलग्नता ठाडै अस्वीकार गरेका छन् ।

अनुसन्धानमा संलग्न रहेका एक अधिकृतका अनुसार उनले सोधिएका सबै प्रश्नमा आफू कतै पनि सहभागी नभएको जनाएका छन् । हरेक प्रश्नको सहजै जवाफ दिनुभयो, सबै प्रश्नको जवाफमा आफ्नो संलग्नता अस्वीकार गर्नुभयो, सहकारी रकमका विषयमा जीवी राई र सागर केसीलाई सोध्नुस् भन्नुभयो, ती अधिकृतले भने ।

उनलाई आजै पोखरा पठाइने भएको छ । २६ दिनदेखि सहकारी ठगी र संगठित अपराध कसुरमा अनुसन्धानका लागि कास्की प्रहरी हिरासतमा रहेका उनलाई मंगलबार रूपन्देही ल्याइएको थियो ।

बुटवलको सुप्रिम सहकारीबाट लामिछानेको नाममा एक करोड ९६ लाख रुपैयाँ गोर्खा मिडिया नेटवर्क प्रालिमा गएको संसदीय विशेष छानबिन समितिको प्रतिवेदनमा उल्लेख छ। जोशी र लामिछानेसहित जीबी राई, भूपेन्द्रबाबु राई, कुमार रम्तेल र गोर्खा मिडिया नेटवर्कका नाममा गरी सुप्रिम सहकारीबाट १४ करोड २९ लाख ३६ हजार रुपैयाँ रकम पठाइएको छानबिन समितिको प्रतिवेदनमा उल्लेख छ।

प्रहरीले सुप्रिम सहकारीका अध्यक्ष ओमप्रकाश गुरुङसहित २८ जनाविरुद्ध जिल्ला अदालत रूपन्देहीमा मुद्दा दायर गरेको थियो। अहिले सहकारीका अध्यक्ष गुरुङ पुर्पक्षका लागि जिल्ला कारागार रूपन्देहीमा छन् भने सहकारीका पूर्वसचिव दीपेश पुनसहित ६ जना धरौटीमा रिहा भइसकेका छन् । कास्की प्रहरीको हिरासतबाट भैरहवा ल्याइएका कुमार रम्तेल र शिवबहादुर गुरुङको बयान भइसकेको छ ।

उता रविको समर्थनमा नेताहरु र कार्यकर्ताहरुले नारा र जुलुस गरिरहेका छन । दैनिक जसो नारा जुलुस कायमै रहेको छ ।