महाभियोगबाट जोगिए दक्षिण कोरियाली राष्ट्रपति,’कुल १ सय ९५ मत’

एजेन्सी । दक्षिण कोरियाली राष्ट्रपति युन सुक येओल महाभियोगबाट जोगिएका छन् । दक्षिण कोरियाली संसद्‍मा शनिबार भएको मतदानमा ‍१ सय ९५ सांसदले मात्र राष्ट्रपति युनविरुद्धको महाभियोग प्रस्तावको पक्षमा मत दिएका हुन् ।

‘कुल १ सय ९५ मत संसद्का‌ कुल सदस्यको दुई तिहाइ बहुमतमा पुग्न सकेन । त्यसैले, म घोषणा गर्दछु महाभियोग प्रस्ताव पारित हुन सकेन,’ सभामुख वु वोन-सिकले भनेका छन् ।

दक्षिण कोरियाली संसद्‍मा कुल ३ सय सांसद छन् । संसद्‍बाट महाभियोग प्रस्ताव पारित गर्न दुईतिहाइ अर्थात् २ सय सांसदको समर्थन आवश्यक पर्छ । शनिबार संसद्‍मा भएको मतदान युनको दल पिपुल्स पावर पार्टी (पीपीपी) का सांसदहरूले बहिष्कार गरेका थिए । पीपीपीका १ सय ८ सांसद छन् ।

संसद्‍मा मतदान भइरहेका बेला दशौं हजार सर्वसाधारणले संसद्‌ भवनबाहिर प्रदर्शन गरेका थिए । उनीहरूले राष्ट्रपति युनको राजीनामा मागेका थिए । प्रदर्शनकारीले पीपीपीका सांसदहरूलाई मतदानमा सहभागी हुन र महाभियोगको पक्षमा मतदान गर्न माग गरेका थिए ।

राष्ट्रपति युनले गत मंगलबार राति अप्रत्याशित रूपमा संकटकालीन ‘मार्सल ल’ लागू गरेका थिए । तर उनले घोषणा गरेको सैनिक शासन केही घण्टामा नै त्यहाँको संसद्‌ले उल्ट्याइदिएको थियो । त्यसपछि युनले आफ्नो कदम फिर्ता लिएका थिए । तर विपक्षी दलका सांसदहरूले भने युनविरुद्ध महाभियोगको प्रक्रिया अघि बढाएका हुन् ।

राष्ट्रपति युनले ‘मार्सल ल’ लागू गरेकामा शुक्रबार माफी माग्दै पुन: यस्तो कदम नचाल्ने वाचा गरेका थिए । ‘म एकदमै क्षमाप्रार्थी छु र स्तब्ध भएका जनतासँग माफी माग्न चाहन्छु,’ टेलिभिजन सम्बोधनमा यूनले भनेका थिए ।

मार्सल ल लागू गरेपछि राष्ट्रका नाममा गरेको पहिलो सम्बोधनमार्फत उनले राजीनामा दिने आकलन गरिएको थियो । सम्बोधनमा महाभियोगको प्रसंगबारे केही उल्लेख नगरेका युनले पदबाट राजीनामा पनि दिएनन् । युनले सत्तामा रहेको आफ्नो दललाई अवस्था सामान्य बनाउने जिम्मेवारी सुम्पिने बताएको बीबीसीले जनाएको छ ।

राष्ट्रपतिको सम्बोधनपछि सत्तारूढ पीपीपीका नेताले युनले नियमित कामकाज जारी राख्न असम्भव रहेको बताएका थिए । ‘उनको अग्रिम राजीनामा अवश्यम्भावी छ,’ पीपीपीका हान दोङ-हुनले भनेका थिए । प्रमुख प्रतिपक्षी दल डेमोक्रेटिक दलका नेता ली जे-म्युङले राष्ट्रपतिको प्रतिक्रियाले मानिसहरूमा थप आक्रोश बढाएको बताएका छन् । उनले राष्ट्रपति युनलाई पदबाट हटाउन आफूहरूले सक्दो प्रयास गर्ने बताएको बीबीसीले जनाएको छ ।

युनले राज्यविरोधी शक्तिहरू र उत्तर कोरियाबाट खतरा भएको जनाउँदै मंगलबार राति मार्सल ल लागू गरेका थिए । मार्सल ल घोषणा गरेको केही समयमै सेनाले आदेश जारी गर्दै संसद्को गतिविधि र राजनीतिक समूहबाट हुने प्रदर्शनमा प्रतिबन्ध लगाएको थियो ।South Korean

तर युनकै दल पीपीपीका साथै विपक्षी दलका सांसदहरूले युनको घोषणालाई तत्कालै गैरकानुनी र असंवैधानिक भएको बताएका थिए । देशकै ठूलो विपक्षी दल डेमोक्रेटिक पार्टीका नेता ली जे–म्यङले राष्ट्रपतिको घोषणाको विपक्षमा मतदानका लागि सांसदहरूलाई संसद्‍मा भेला हुन र कोरियाली जनतालाई राष्ट्रपतिको कदमविरुद्ध प्रदर्शनमा उत्रन आग्रह गरेका थिए ।

त्यसलगत्तै संसद्‍मा उपस्थित सबै १ सय ९० जना सांसदले राष्ट्रपतिको निर्णयको विपक्षमा मतदान गरेका थिए । संसद‍्को बहुमतले निर्णय गरेपछि राष्ट्रपति युन आफ्नो निर्णय उल्टाउन बाध्य भएका थिए । राष्ट्रपति युनले ‘उत्तर कोरियाको कम्युनिस्ट शक्तिहरूबाट जोगाउन र राज्यविरोधी तत्त्वहरूलाई परास्त गर्न मार्सल कानुन आवश्यक भएको’ दाबी गरे पनि देशभित्रको दबाब र घोटालाका कारण उक्त कदम चालेको बताइन्छ ।

सन् २०२२ मा राष्ट्रपतिमा निर्वाचित युन पत्नीका कारण समस्यामा परेका थिए । उनकी पत्नी किम किअन हीले गैरकानुनी रूपमा महँगो ब्रान्डको ‘ब्याग’ उपहारमा लिएको र धितोपत्र बजारमा चलखेल गरेको आरोप लागेको थियो । जसका कारण गत अप्रिलमा भएको संसदीय चुनावमा युनको दल पीपीपीले ठूलो हार व्यहोरेको थियो । निर्वाचनमा विपक्षी पार्टीले फराकिलो जित हासिल गरेपछि उनको सरकारले चाहेका कानुनहरू पारित गर्न सकिरहेको छैन ।