६ दिनदेखि बेपत्ता पुरुषको शव सशस्त्र प्रहरी बलको गोताखोरले ७० फिट गहिराइबाट निकाल्यो

काठमाडौं । काबेली खोलामा नुहाउने क्रममा ६ दिनदेखि बेपत्ता राजेन्द्र बुढाथोकीको शव सशस्त्र प्रहरीको गोताखोरले टोलीले फेला पारेको छ ।

सशस्त्र प्रहरीका अनुसार शव घटनास्थल भन्दा करिब ५० मिटर पर ७० फिटको गहिराइबाट निकालेको हो ।

ताप्लेजुङ जिल्लाको सिरिजंघा गाउँपालिका–५ स्थित काबेली खोलामा नुहाउने क्रममा सोही गाउँपालिका–५ स्थित पेदाङ बस्ने ४५ वर्षीय बुढाथोकी मंसिर १९ गते बेपत्ता भएका थिए ।

उनको शव खोलाको दहमा बालुवाले पुरिएको अवस्थामा मंसिर २५ गते गोताखोरले फेला पारेको हो ।

घटनाबारे जानकारी पाएपछि सशस्त्र प्रहरी बल नेपाल नं १ बराह बाहिनी मुख्यालय सुनसरीबाट गोताखोर तथा विपद् व्यवस्थापन तालिम प्राप्त सुरक्षा फौज मंसिर १९ गते नै उनको खोजी कार्यमा निरन्तर खटिएको थियो ।