डीपी अर्याल भन्छन्- रास्वपा नेतृत्वमा आएपछि भ्रष्टाचारीहरूको भागाभाग हुनेछ (भिडियो सहित)

काठमाडौं । राष्ट्रिय स्वतन्त्र पार्टीका कार्यवाहक सभापति डीपी अर्यालले पार्टी सभापति रवि लामिछानेमाथि प्रतिशोध राखिएको पुष्टि भइसकेको दाबी गरेका छन् ।

पार्टी स्थापना दिवसको अवसरमा आयोजित कार्यक्रमलाई सम्बोधन गर्दै उनले भ्रष्टाचारको अन्त्य गर्ने अभियान बोकेर हिँडेकै कारणले पार्टी सभापतिमाथि प्रतिशोध राखिएको बताए ।

उनले यो सरकारले आफूहरूलाई मत दिएको १२ लाख मतदातालाई अपमान गरिरहेको जिकिर गरे ।

कार्यबाहक सभापति अर्यालले भने, ‘हामी २१ जनालाई होइन, १२ लाख मतदातालाई अपमान गर्ने काम भइरहेको छ । अब जब मतपेटिका सबैमा घण्टीको छाप लाग्नेछ, एक दिन यस्तो दिन आउनेछ, उनीहरूलाई मैले त भन्ने गरेको थिएँ, यो देशमा कुनै बेला धेरै जेलहरू बनाउनुपर्ला, पछिल्लो समय लाग्यो, हामी त खुला बोर्डरमा छौँ। जेल बनाउने पैसा नै बच्ने रहेछ। भ्रष्टाचारीहरू त ओपन बोर्डरबाट भागाभाग गर्ने रहेछन् जब हाम्रो उपस्थिति हुन्छ ।’

रवि लामिछानेमाथि राजनीतिक प्रतिशोध भएको हो भन्ने कुरा अब रास्वपाका नेताहरूले, शुभचिन्तकहरूले भन्नु नपर्ने उनको भनाइ छ ।