धनगढी । सुदूरपश्चिम प्रदेशका मुख्यमन्त्री कमल बहादुर शाहले जेनजी आन्दोलनका क्रममा तोडफोड तथा आगजनी भएका सरकारी कार्यालयहरूको स्थलगत अनुगमन गरेका छन् । मंगलबार बिहान उनले मुख्यमन्त्री तथा मन्त्रिपरिषद्को कार्यालय, आर्थिक मामिला मन्त्रालय, भौतिक पूर्वाधार मन्त्रालय, प्रदेश सभा भवन र सामाजिक विकास मन्त्रालय लगायतका संरचनामा पुगेर क्षतिको जानकारी लिएका हुन् ।

भदौ २३ र २४ गते भएको जेनजी युवाहरूको प्रदर्शनका क्रममा सुदूरपश्चिम प्रदेशमा ठुलो भौतिक क्षति पुगेको छ । प्राप्त विवरणअनुसार, प्रदेशभर २३३ वटा भौतिक संरचनामा क्षति पुगेको छ, जसमा १५ प्रहरी कार्यालय, १४९ सरकारी कार्यालय, ३५ व्यापारिक तथा निजी भवन र ३४ वटा पार्टी कार्यालय रहेका छन् ।

आन्दोलनले सबैभन्दा बढी कैलाली र कञ्चनपुर जिल्लामा प्रभाव पारेको छ ।कैलालीमा मात्रै १०८ वटा सरकारी कार्यालयमा आगजनी, तोडफोड र लुटपाट भएको बताइएको छ ।

प्रदर्शनका क्रममा सवारीसाधनमा पनि व्यापक क्षति भएको छ । प्रदेशमा ६८८ वटा सवारी साधनमा क्षति पुगेको छ, जसमा १ सय १० वटा चार पाङ्ग्रे सवारी र ५ सय १५ भन्दा बढी दुई पाङ्ग्रे सवारी नष्ट भएका छन् । मुख्यमन्त्री कार्यालय परिसरमा रहेका मुख्यमन्त्री, मन्त्री र सचिवले प्रयोग गर्ने ११ वटा गाडी पनि जलेर नष्ट भएका छन् ।

आगजनीबाट सरकारी कार्यालयका फर्निचर, कम्प्युटर, महत्वपूर्ण कागजातहरू जलेर नष्ट भएका छन् भने केही सामान चोरी समेत भएको छ ।मुख्यमन्त्रीको कार्यालय जलेर खण्डहर बनेको छ, जसको पहिलो र दोस्रो तला लगभग पूर्ण रूपमा खरानी भएको छ ।यस्तै, प्रदेश सभा सचिवालयको भवनमा समेत आगजनी गरिएको छ र त्यहाँ रहेका मोटरसाइकल तथा फर्निचरहरू जलाइएको छ ।

यो आन्दोलनका कारण अर्बौं रुपैयाँ बराबरको सरकारी संरचना ध्वस्त भएको अनुमान गरिएको छ ।क्षतिको यकिन विवरण संकलन गर्ने काम भइरहेको र प्रहरीले मुचुल्का उठाएर सेवा प्रवाहको तयारी गरिरहेको जनाइएको छ ।