काठमाडौँ । नवगठित नेपाली कम्युनिस्ट पार्टीका सहसंयोजक माधवकुमार नेपालले विभिन्न राजनीतिक पार्टीहरु मिलेर बनेको नयाँ पार्टी र नेताहरूको अग्निपरीक्षा सुरु भएको बताएका छन् ।

बुधबार भएको एकता सभा तथा राष्ट्रिय सम्मेलनलाई सम्बोधन गर्दै सहसंयोजक नेपालले यस्तो बताएका हुन् । उनले बाँकी बाम शक्तिहरूलाई समेत यही मोर्चामा आएर बृहत् वाम एकतामा सहभागी हुन आह्नवान समेत गरे ।

‘हाम्रो अग्निपरीक्षा अब सुरु हुँदै छ । जनताले हामीलाई नियालिरहेका छन्’, नेपालले भने, ‘यो पुरानै पार्टीको रूप होइन, पुराना हाम्रा पार्टीमा रहेका कमी कमजोरीबाट मुक्त भएर, समीक्षा गरेर, सुधारेर, नयाँपन दिएर, देश भक्तिको नमुना बनेर, परिवर्तनको संवाहक भएर क्रान्तिकारी चरित्र बोकेका योद्धाहरूको पार्टी हामीले बनाएका छौ भनेर जनतामा विश्वास दिनुपर्ने आवश्यकता छ ।’

नेता नेपालले परिवर्तनका हिमायतीहरूलाई अघि बढाएर लैजाने उद्देश्यअनुसार संविधान, गणतन्त्र र सङ्घीयताको रक्षा गर्दै हातेमालो गरेर अघि बढ्नुपर्ने बताए । ‘विभिन्न शक्तिसँग मोर्चा बनाउनेछौँ, एकीकृत गराउने छौँ । जोसँग सिद्धान्त, कार्यनीति कार्यक्रम मिल्नेछन्’, उनले भने, ‘समाजवादको उद्देश्यका निम्ति अघि बढ्नेसँग एकताको प्रयास गर्नेछौँ ।’ नवगठित पार्टी सङ्कीर्ण र साँघुरो सोचका साथ अघि नबढ्ने भन्दै विदेशीको दलाली गर्नेहरूसँग सम्झौता नगर्ने नेपालको भनाइ छ ।

नेता नेपालले युवा पुस्तालाई समेत विश्वासमा लिएर पार्टी सञ्चालन गरिने दाबी गरे ।