काठमाडौ । खानेपानी मन्त्रालय र मातहतका निकायमा पूर्व मन्त्री प्रदिपकुमार यादवले आर्थिक चलखेलमा अन्यायपूर्ण र भेदभावपूर्वक गरिएको कर्मचारीहरुको सरुवाको पुनरावलोकन भएको छ ।

खानेपानी मन्त्रालयको जिम्मेवारी सम्हालेको ४ दिनकै बीचमा मन्त्री डाक्टर मदन कुमार परियारले कर्मचारीहरुको सरुवा र पदस्थापना गरि पुलमा कर्मचारी राखेर अपहेलना र मानमर्दन गर्ने कामको अन्त गरेका छन । खानेपानीका सहसचिवहरुको सरुवा र कार्यालयहरुमा पदस्थापना गरिएको हो । काठमाडौं उपत्यका खानेपानी आयोजना कार्यन्वयल निर्देशनालयबाट समयअवधि नपुग्दै सरुवा भएका टिका चौधरीलाई पुनः आयोजनामा सरुवा गरिएको छ । यो सरुवाले चौधरीको करीयरलाई न्याय दिएको छ भने पैसा र शक्तिको बल पराजित भएको छ ।

अख्तियार दुरुपयोग अनुसन्धान आयोगबाट खानेपानी मन्त्रालयमा सेटिङ मिलाएर सरुवा भएका एमालेका नेता सहसचिव लक्ष्मीप्रसाद उपाध्याय खानेपानी विभागको उपमहानिर्देशकमा सरुवा भएका छन । उनको सरुवाले पावर, पैसा, धाक र धम्कीवालाहरुलाई नैतिक शिक्षा प्रदान गरेको सरोकारवालहरुको तर्क रहेको छ ।

त्यसै गरि मन्त्री यादवले पैसा खाएर सहसचिवको दरबन्दी भएका कार्यालयहरुमा उपसचिवलाई कार्यालय प्रमुख बनाएका थिए भने सहसचिवहरु पुलमा बस्न बाध्य बनाइने परम्परालाई अन्त गर्दै मन्त्री परियार, खानेपानी सचिव रामआधार साह र प्रशासन महाशाखाका सहसचिव रुद्रप्रसाद पण्डितले नेपालगञ्ज, पोखरा र विराटनगरमा सहसचिवलाई पदस्थापना गरेका छन । ई.नारायण प्रसाद आचार्यलाई खानेपानी तथा ढल व्यवस्थापन कार्यालय पोखरा सरुवा गरिएको छ ।

मेलम्ची खानेपानी आयोजनाका कार्यकारी निर्देशक जगरनाथ दासलाई भने खानेपानी तथा ढल व्यवस्थापन कार्यालय नेपालगन्ज सरुवा गरिएको छ भने केन्द्रीय खानेपानी आयोजनाका आयोजना निर्देशक उज्जवल प्रजापतिलाई खानेपानी तथा ढल व्यवस्थापन कार्यालय विराटनगर सरुवा गरिएको छ ।

मन्त्रालय स्रोतका अनुसार खानेपानी मन्त्रालयको योजना महाशाखाका सहसचिव बाल मुकुन्द श्रेष्ठलाई मेलम्ची खानेपानी आयोजनाको कार्यकारी निर्देशकमा सरुवा गरिएको छ । महाशाखा प्रमुखको जिम्मेवारी मन्त्रालयकै सहसचिव रमाकान्त दुवाडीलाई दिईएको छ।

सहसचिवहरुको सरुवाले अन्याय र अत्याचारको अन्तको आरम्भको दिनका रुपमा खानेपानीका प्राविधिक सहसचिवहरुले लिएका छन । मन्त्री यादवले अन्यायपूर्व ढंगले सरुवा गरिएका रामकुमार श्रेष्ठलाई पनि चाडै न्याय हुने आशा र विश्वास कर्मचारीहरुले लिएका छन ।

खानेपानी मन्त्रालयमा ९० प्रतिशत कार्यसम्पादन सफलता हासिल गरेका श्रेष्ठलाई महानिर्देशकबाट मन्त्री यादवले हटाएर कमलराज श्रेष्ठलाई लगिएको थियो । मन्त्री परियारले त्यहाँ पनि धेरै दिन अन्याय रहिरहन दिने छैनन भन्ने विश्वास खानेपानी मन्त्रालयमा पलाएको छ ।

जरा गाडेर बसेका आयोजनाका केहि सिडिईहरुको पनि चाँडै सरुवा हुने संकेत देखिएको छ ।