सुर्खेत । कालिकोटमा नेपाली कम्युनिस्ट पार्टी (नेकपा)बाट उम्मेदवार रहेका पूर्व मुख्यमन्त्री महेन्द्रबहादुर शाहीले चुनावी अभियानका क्रममा धामी—झाँक्रीबाट आशीर्वाद लिँदै गरेको भिडिओप्रति टिका–टिप्पणी भएपछि उनले प्रष्टीकरण दिएका छन् ।

अभियानका क्रममा उम्मेदवार शाही पलाँता गाउँपालिका—१ खाडाबस्ती पुगेका थिए । त्यहाँ देउताका धामीले शाहीको शिरमा हात राख्दै चुनाव जित्न भन्दै आशीर्वाद दिइरहेका देखिन्छन् । उक्त भिडिओलाई १० वर्षे सशस्त्र युद्धसँग जोडेर कम्युनिस्ट विचारबाट विचलन भएको भन्दै आलोचना भएपछि उनले प्रष्टीकरण दिएका हुन् ।

शाहीले कम्युनिस्ट विचारबाट विचलन नभएको र स्थानीय संस्कृति र जनआस्थालाई सम्मान गर्दै चुनावी अभियानलाई जनस्तरसँग अझ नजिक बनाएको बताए ।

‘स्थानीयवासीले यसलाई जनप्रतिनिधिको सांस्कृतिक संवेदनशीलता र जनभावनाप्रतिको सम्मानका रूपमा लिनुभएको छ,’ शाहीले भने ।

शाहीले आफू भौतिकवादी र विज्ञानसम्मत कम्युनिस्ट दर्शनप्रति दृढ रहेको स्पष्ट पारे । ‘समाजमा विद्यमान संस्कार, परम्परा र विश्वासलाई बलपूर्वक नकार्ने भन्दा पनि क्रमिक रूपान्तरण आवश्यक हुन्छ,’ उनले कुरा गर्दै भने, ‘कम्युनिस्ट विचार जनताबाटै जन्मिने हो, जनताको संस्कृति, भावना र मनोविज्ञान बुझ्न नसक्ने विचार कहिल्यै बलियो हुँदैन ।’

कम्युनिस्ट आन्दोलनकै इतिहास हेर्ने हो भने पनि जनसंस्कृति, जनविश्वास र सामाजिक यथार्थसँग टकराब नभई संवाद र रूपान्तरणको बाटो अवलम्बन गरिएको पनि उनको भनाइ छ ।

उनले भने, ‘हो, हामीले जनयुद्ध र आन्दोलनका कठिन कालखण्डमा अन्धविश्वासविरुद्ध आवाज उठाएका हौँ, यद्यपि जनताको चेतनास्तर फरक–फरक रहेको छ नै ।’ वैज्ञानिक सोचको विकास दीर्घकालीन सामाजिक प्रक्रियाबाट मात्रै सम्भव हुने उनको भनाइछ ।