काठमाडौँ । काठमाडौँ उपत्यका विकास प्राधिकरणद्वारा सञ्चालित दिव्येश्वरी जग्गा एकीकरण आयोजना, भक्तपुरमा कार्यरत सव-इन्जिनियर कुमार पौड्यालविरुद्धको भ्रष्टाचार मुद्दामा साक्षी प्रमाण बुझ्ने आदेश जारी भएको छ।

विशेष अदालतका अध्यक्ष सुदर्शनदेव भट्ट तथा न्यायाधीश डिल्लीरत्न श्रेष्ठ र विदुर कोइरालाको इजलासले सोमबार साक्षी प्रमाण बुझ्ने आदेश दिएको हो।

पौड्यालविरुद्ध साढे तीन करोड रुपैयाँभन्दा बढीको भ्रष्टाचार मुद्दा दायर भएको छ। पदीय मर्यादाविपरीत कार्य गरी तीन करोड ६३ लाख २१ हजार रुपैयाँ गैरकानुनी सम्पत्ति आर्जन गरेको आरोपमा अख्तियार दुरुपयोग अनुसन्धान आयोगले आइतबार विशेष अदालतमा मुद्दा दायर गरेको थियो।

अख्तियारका अनुसार पौड्यालले २०५१ वैशाख ९ गतेदेखि २०८० असार ३१ गतेसम्मको अवधिमा उक्त रकम बराबरको भ्रष्टाचार गरेका हुन्। यस अवधिमा उनको वैध आय दुई करोड ५८ लाख ९७ हजार रुपैयाँ मात्र रहेकोमा घर निर्माण खर्च, जग्गा खरिद, अध्ययन खर्च, पिस ब्याङकुट एन्ड रेस्टुरेन्ट प्रालिमा लगानी, सवारी साधन खरिद, सेयर खरिद, ऋण सापटी भुक्तानी, सुन खरिद, बिमा प्रिमियम भुक्तानी र बैङ्क मौज्दातसमेत गरी कुल छ करोड २२ लाख १८ हजार रुपैयाँ बराबरको सम्पत्ति भेटिएको उल्लेख छ।

तीन करोड ६३ लाख रुपैयाँ ऋणात्मक देखिएकाले गैरकानुनी रूपमा सम्पत्ति आर्जन गरेको पुष्टि भएको भन्दै अख्तियारले साबिक भ्रष्टाचार निवारण ऐन, २०१७ को दफा १५ र प्रचलित भ्रष्टाचार निवारण ऐन, २०५९ को दफा २० को उपदफा (१) बमोजिम सजायको मागदाबी गरेको छ।