Monday 22nd of April 2019

‘लभ स्टेसन’ को व्यापार दुई करोड

काठमाडौं । उज्ज्वल घिमिरेले निर्देशन गरेको चलचित्र ‘लभ स्टेसन’ ले रिलिजको तीन दिनमा दुई करोडको व्यापार गरेको निर्माण पक्षले जनाएको छ । स्कुल कलेज बिदा भएका कारण पनि चलचित्रले राम्रो व्यापार गरिरहेको प्रस्तुतकर्ता गोविन्द शाहीले बताए । आफ्नो फिल्मले यही गतिमा एक सातासम्म व्यापार गर्दा लगानी सुरक्षित भएर केही मुनाफा हुने शाहीले जिकिर गरे ।

शुक्रबारबाट देशका १ सय ४ हलमा लागेको यो चलचित्रको वियोगान्त गीत ‘कहाँ राख्न सकें…’ को भिडियो मंगलबार सार्वजनिक गरिएको छ । अभिनेत्री जसिता गुरुङको अर्का अभिनेता प्रकाश शाहसँग विवाह हुने भएपछि जसिताको प्रेमी बनेको अभिनेता प्रदीप खड्काले प्रेमवियोगमा विवाह समारोहमा यो गीत गाएका छन् । अभिनेता प्रदीप ब्यान्डमा गाएको भूमिकामा छन् । दीपक शर्माको शब्द तथा संगीत रहेको यो गीतलाई डेभिड शंकरले गाएका छन् । गीतको संगीत संयोजन रितेस गुरुङले गरेका हुन् ।

सांगीतिक प्रेमकथामा आधारित यो चलचित्रलाई कविर विक्रम शाही र कृशु शाही (काफिया) ले निर्माण गरेका हुन् । यो चलचित्रमा प्रदीप र जसितासँगै प्रकाश शाह, रमेश बुढाथोकी, प्रिया रिजाल, सिरु बिष्ट, रवी डंगोल, दिनेश काफ्ले, कालु राना, रश्मी पाण्डे, रिसु खरेल लगायतका कलाकारको अभिनय छ ।

प्रतिक्रिया दिनुहोस्