कैलाली । सरकारले धानको मूल्य तोक्दा पनि किसानहरूले सस्तोमा धान बेच्न बाध्य भएको भन्दै एक युवा अनसनमा बसेका छन् ।

जसको कोही छैन त्यसको हामी छौँ भन्ने अभियानका प्रमुख नेत्र भण्डारी भाइटिकाको दिनदेखि जिल्ला प्रशासन कार्यालय कैलालीको गेटमा अनसन बसेका हुन् ।

भण्डारीले सरकारले तोकेको मूल्य किसानले पाउनु पर्ने माग राखेका छन् ।

सरकारले भदौ २६ गते मोटा धानको ३ हजार ४६३ रुपैयाँ ८१ पैसा र मध्यम धानको ३ हजार ६२८ रुपैयाँ ३३ पैसा निर्धारण गरेको थियो ।

जिल्ला प्रशासन कार्यालय कैलालीले असोज ३१ गते सरकारले निर्धारण गरेको मूल्य कार्यान्वयन गर्न सूचना पनि जारी गरिसकेको छ । तर, कैलालीमा अझै पनि तोकिएको मूल्य भन्दा झन्डै १ हजारदेखि १५ सयसम्म कममा किसानहरूले धान बेच्न बाध्य छन् ।

सरकारले तोकेको मूल्य पनि किसानले पाउन नसक्नु दुर्भाग्य रहेको भन्दै त्यो मूल्य कार्यान्वयन गराउन अनसन बसेको भण्डारी बताउँछन् ।

‘सरकारले तोकेको मूल्यभन्दा बढी मूल्य किसानले पाउनु पर्ने हो तर, यहाँ तोकेको मूल्य पनि पाइरहेका छैनन् । किसानले धान फलाउने मूल्य व्यापारीले निर्धारण गर्ने कुरा गलत हो ’ उनले भने ‘अब आफ्नो धानको मूल्य किसानले तोक्नु पर्छ, नत्र सरकारले तोकेको मूल्य व्यापारीले दिनुपर्छ । म त्यही कार्यान्वयनको लागि अनसन बसेको हु ।’

शनिवारबाट जिल्ला प्रशासन अगाडी अनसन बसेका भण्डारीको माग पुरा गर्न मुख्यमन्त्री कमल बहादुर शाहले प्रमुख जिल्ला अधिकारी कृष्ण प्रसाद लम्साललाई फोन गरेका थिए ।

यसअघि पनि मुख्यमन्त्री शाहले धानको मूल्य कार्यान्वयन गराउन प्रमुख जिल्ला अधिकारीलाई फोनमार्फत निर्देशन दिएका थिए ।

मुख्यमन्त्री शाहले तत्काल भण्डारीसँग संवाद गरेर समस्या समाधान गर्न निर्देशन दिएपछि प्रमुख जिल्ला अधिकारीले भण्डारीलाई वार्तामा बोलाएका छन् ।

अहिले ११ बजे जिल्ला प्रशासन कार्यालयमा किसानका अगुवा , उद्योग वाणिज्य, जेनजीका प्रतिनिधीहरुबीच वार्ता गरेर माग सम्बोधनको तयारी भइरहेको छ ।

अनसनरत भण्डारीले तत्काल किसानले तोकिएको मूल्य पाउनु पर्ने र सरकारले मूल्य निर्धारण गरिसकेपछि सस्तोमा बिक्री गरेका किसानहरूले क्षतिपूर्ति पाउनु पर्ने बताएका छन्।