रुपन्देही । प्यूठानको माण्डवी गाउँपालिकाको १८ औं गाउँसभा वडा नम्बर ३ र ५ का १० जना सदस्यले बहिष्कार गरेका छन् । उनीहरूले बजेट निर्माण प्रक्रियामा एकलौटी र अपारदर्शी भएको आरोप लगाएका छन् ।

वडा नं ३ का अध्यक्ष धनेन्द्र कार्कीले गाउँपालिकाको नेतृत्वले वडाबाट योजना मागे पनि छनोट प्रक्रियामा कुनै छलफल नगरी मनपरी ढंगले बजेट तयार गरेको आरोप लगाएका छन् ।

‘योजना छनोटमा वडाको आवाज सुन्ने प्रयासै भएन’, उनले भने, ‘छलफल र सहमतिविना एकलौटी ढंगले बजेट ल्याइएको देखिएपछि हामी सहभागी भएनौं ।’
वडा नं ५ का अध्यक्ष दुर्गाप्रसाद आचार्यले पनि उस्तै असन्तुष्टि व्यक्त गर्दै भने, ‘स्थानीय आवश्यकता र प्राथमिकता लत्याउँदै अध्यक्ष–उपाध्यक्षले आफ्नो मनपरी योजना घुसाउने प्रयास गरेका छन् । यस्तो प्रवृत्तिविरुद्ध हाम्रो बहिष्कार हो ।’

उनीहरुले बहिष्कार गरे पनि अधिवेशन भने जारी छ । गाउँपालिकाको नेतृत्वले यसबारे कुनै जवाफ दिएको छैन ।

पालिका अध्यक्ष नवराज अधिकारी रोशन माओवादी केन्द्रबाट निर्वाचित हुन् । उपाध्यक्ष पूर्ण कालाखेती नेपाली कांग्रेसबाट निर्वाचित हुन् । बहिस्कार गर्ने कार्की र आचार्य एमालेबाट निर्वाचित भएका हुन् ।